SIRI ILIYO BAYANA

Mtunzi~Kinyafu Marco.

©️2018,

kinyafumarcos@gmail.com.

0714 129 520.

1.Kuna misingi mitano,katika haya maisha

Sikiliza hili neno,njia litakuonyesha

Hii siri nzito mno,wengi yawafanikisha.

Maisha bila kanuni,katu hatuwezi shinda.

2.Wa kwanza ndio uzima,ambao Mola katupa

Pumzi katupa twahema,na leo ndo tupo hapa

Elewa hili mapema,usitumie kwa pupa

Timiza malengo yako,hali ungali uzima.

3.Wa pili ndio wakati,ambao twautumia

Kwenye mingi mikakati,mipango tulonuia

Hili ndilo swala nyeti,mwenzangu hebu sikia

Wakati ukipoteza,hauwezi jirudia.

4.Watatu ndio nidhamu,katika yako malengo

Tumia yako kalamu,andika yote mipango

Ili ushike hatamu,nidhamu ndio kiungo

Nidhamu yako binafsi,hiyo ndo silaha yako.

5.Wanne ndio juhudi,katika kwako kutenda

Kila siku jitahidi,kitu kipya kukiunda

Cha jana leo kizidi,hapo ndipo utashinda

Juhudi ukiiweka,utafaidi matunda.

6.Wa mwisho huu mzito,huu waitwa subira

Hapa ipo changamoto,wengi wakosa busara

Matumbo yajaa joto,wanaogopa hasara

Subira ikiwa ndogo,faida huwezi pata.

7.Siri iliyo bayana,kila mtu kaijua

Nimekupa kwa mapana,kazi kwako kuamua

Siri sio siri tena,fumbo nimelifumbua

Siri iliyo bayana,anza leo kuitenda.

___________MWISHO_______________

🌐JocheApp