WOSIA WA BABA

1. Naikamata kalamu,wosia huu natuma
Naanza nayo salamu,ndilo jambo la hekima
Wanangu nawasalimu,baba yenu ninasema
Nyakati hizi za mwisho,wanangu ziepukeni

2. Moyo unanisukuma,niseme yangu ya ndani
Mawazoni nimezama,sijui nianze nini
Isikieni kalima,inayo mambo yakini
Nyakati hizi za mwisho,wanangu ziepukeni

3. Nalotaka mfahamu,ni kuhusu jambo hili
Siku hizi wanadamu,wamejawa ujahili
Msije kupewa sumu,kweli mkaacha mbali
Nyakati hizi za mwisho,wanangu ziepukeni

4. Kutabana kwa henezi,wala hawaoni shida
Wanaufanya ulozi,wameiacha ibada
Chuki zao zipo wazi,wanaupoteza muda
Nyakati hizi za mwisho,wanangu ziepukeni

5. Wengine hawashakiki,kwa kupenda kujivuna
Wana mwingi uzandiki,mambo yao ni bayana
Kweli wao hawataki,wamechagua laana
Nyakati hizi za mwisho,wanangu ziepukeni

6. Zitambueni nyakati,kuwa huu ndio mwisho
Ukomboeni wakati,kwa kujenga yenu kesho
Msipende shotikati,mouvu hayana posho
Nyakati hizi za mwisho,wanangu ziepukeni

7. Wapo wataowabeza,kisa mmeshika kweli
Lisiwafanye kuwaza,kweli kuitupa mbali
Dunia itawameza,wana sikieni hili
Nyakati hizi za mwisho,wanangu ziepukeni

8. Kungekuwapo na simu,wana ningewapigia
Niwafungue fahamu,kuhusu hii dunia
Nipo na nangoja hukumu,simu siwezi tumia
Nyakati hizi za mwisho,wanangu ziepukeni

9. Kituo sasa nafika,hii ndo yangu hatima
Kalamu chini naweka,wosia kwenu natuma
Kamwe msiache shika,yangu niliyoyasema
Nyakati hizi za mwisho,wanangu ziepukeni

________________________________

Mtunzi: Kinyafu Marcos.
Contact: +255 714 129 520
Barua pepe: kinyafumarcos@gmail.com

Imeletwa na Joche App
Joche Team